Full klaff for feiringa av Torstein Nesse sin 80 årsdag

I strålande solskin vart Torstein Nesse hylla på sin 80 årsdag på Arna idrettspark. Arrangementskomiteen vil takka alle som var med å kasta glans over jubilanten. 

Vår filmfotograf Torgils Fossen har publisert video på YouTube: https://youtu.be/yEcqU9i8atE
Se foto av Torstein frå gamle dagar og helsingar i stevneprogrammet: Program TNG 1_aug.pdf

Under elitestevne-delen blei det sett ny junior-verdsrekord på 1 engelsk mil for døve då Tobias Allers-Hansen, Gneist sprang inn til 4,24,75 og 4.plass for menn senior. I tillegg vart det 6 nye banerekordar og ei tangering.

Det beste internasjonale resultat kom i diskos av EM-uttatte Sven Martin Skagestad, Norna-Salhus som kasta heile 58,77m. Sven Martin tok også banerekorden i kule med eit lengste støyt på 17,11m. IL Fri sin EM-uttatte mangekjempar Martin Roe sesongdebuterte i 3 øvingar. Først fekk vi eit spennande oppgjer på 100m der Sondre Lindaas Gjesdal, Gular tangerte banerekorden på 100m med 11,01 tett følgd av Martin og Gjert Høie Sjursen, Gneist som begge noterte 11,03. På 100m for kvinner sprinta Leah Marie Henriksen Indrebø, Ask Friidrett inn til ny banerekord 12,38. Leah vann også 200m med 25,76.

Andreas Haara Bakketun, Gular suste inn til ny banerekord på 200m med solide 21,67. På 1 engelsk mil var Kristine Lande Dommersnes, Haugsund suveren vinnar med 4,51,85. I og med at det var offisielle passeringstider på 1500m sikra ho seg enda ein banerekord med 4,32,29.

Vilde Sofie Torvund, Fri blei nr.2 på 1 engelsk mil med 5,17,11. Dermed sletta ho klubbrekorden til Siw M. Voldsund på 5,35,75 frå 1983. Martin deltok også i kule og diskos med to andreplassar. Resultata 14,66m i kule og 45,72m i diskos var godt levert i årets første konkurranse for Martin. Vi ønskjer Martin og Sven Martin begge lykke til i EM i München.

Elles gledeleg pers av Anders Vågen, Fri på 5000m med 15,44,58. Distansen vart vunnen av Bjørge Bjørsvik Larsson, Varegg med 15,23,32. Trygve Feidje Mjelde, Osterøy sletta ein gammal mosegrodd Osterøy-klubbrekord på 1 engelsk mil då han spurta i mål på 4,09,57 etter å ha passert 1500m på 3,53,46. Marius Sørli, Ask Friidrett sette Askøy-rekord på 1 engelsk mil med 4,10,81. Han persa også krafig på 1500m med 3,54,30.

I lengde klarte Magnus Reigstad, Osterøy nesten å bryte 7 metersstreken med eit lengste hopp på 6,98m. Sofie Olsvold Hausberg, Os Turn var lengst av damene med 5,07m. I kvinnene sine kastøvingar gjekk Solveig Fredriksen til topps i diskos med 47,98m og Mariell Hetlesæter Morken, Voss i kule med 13,31m.